Plantun de Prouvènço

Pèr coumpara dos planto d'encò nostre

Camphorosma monspeliaca & Euonymus europaeus

Canfourato

Camphorosma monspeliaca

Amaranthaceae Chenopodiaceae

Autre noum : Canfrado.

Noms en français : Camphorine de Montpellier, Camphrée.

Descripcioun :
La canfourato es une planto rebaladisso que trachis dins li tepiero sablouso majamen en ribo de mar. Li cambo soun cuberto de péu crespu, li fueio d'en bas soun primo alor que li d'en aut, soun mai óuvalo. Li flour, mistoulino, an 4 estamino e dous estigmate.

Usanço :
Au contro de ço que se pòu legi un pau d'en pertout, la canfourato a pas gès d'óudour de canfre (o bessai acò èi de vèire emé li relarg). La planto sarrié vertuouso contro lou tussi, pèr faire pissa, suda, e pèr sougna li plago e li macaduro.

Port : Pichoto planto lignouso
Taio : 10 à 60 cm
Fueio : alterno
Tipe bioulougico : Camefite
Cicle bioulougico : Planto renadivo

Gènre : Camphorosma
Famiho : Amaranthaceae
Famiho classico : Chenopodiaceae

Coulour de la flour : Verdo
Petalo : ges
Ø (o loungour) flour : 2 à 3 mm
Flourido : Estiéu - Autouno

Sòu : Ca
Autour basso e auto : Pancaro entresigna
Aparado : Noun
Avoust à Nouvèmbre

Liò : Mar - Sablo - Tepiero seco - Escoumbre e proche dis oustau
Estànci : Termoumediterran à Mesoumediterran
Couroulougi : Éurasiatico-Cèntre-Ouèst
Ref. sc. : Camphorosma monspeliaca L., 1753

Bounet-de-capelan

Euonymus europaeus

Celastraceae

Àutri noum : Fusan, Coulougnet, Grano-pesoulino.

Noms en français : Fusain, Fusain d'Europe.

Descripcioun :
Lou bounet-de-capelan es un aubret que trachis dins li relarg fres e proche d'aigo. Fai de fueio longo de 2 à 10 cm e de pichòti flour en crous de 6 à 10 mm. Mai se recounèis subretout emé si fru que sèmblon li bounet que pourtien, à passa tèms, li capelan. Aquéli soun roso e quàsi redoun sus lou dessubre e caupon 4 grano. Coumpara emé lou bounet-de-capelan-di-làrgi-fueio qu'èi pentamèro.

Usanço :
Couneissèn pas d'usanço particuliero en Prouvènço pèr aquelo planto. Pamens se saup qu'es emé soun bos cabounisa que se fai lou fusan pèr lou dessin. Dins d'ùni relarg se servien di fru pèr tencha en rouge.